далее...
Велика Истине труба,* многострадальныи Афанасий,* на трапезу днесь созывает Церковь* - светло вернии* вси къ торжеству усрящем добраго пастыря,* песньми почитающе священныя его труды,* яко да молитвами его* приимем от Христа велию милость.* (в глас 3, стихера, Славник на Стиховне Утрени). Тропарь, глас 3. Столп бысть православия - Божественными учении утверждая Церковь, святителю Афанасие: Отцу бо Сына Единосущна проповедав - посрамил еси Ария.
Отче-преподобне, Христа-Бога моли даровати нам велию милость.
Слава, и ныне. Тебе - Ходатаицу спасения рода нашего, воспеваем, Богородице-Дево: плотию бо, еюже из Тебе прошед Сын Твой и Бог наш, крестную прием страсть - избавил есть нас из истления, яко Человеколюбец.
КАНОН СВЯТИТЕЛЮ ХРИСТОВУ АФАНАСИЮ ВЕЛИКОМУ
Канон, глас 8. Песнь 1, ирмос: Вооруженна фараона погрузи Чудотворяи древле: моисейскии жезл крестообразно прорази - и Разделивыи море, израиля же, бежаща, пеша ходяща спасе, песнь Богови возъсылающа.
ЗАПЕВ: Святителю Христов Афанасие Великии, моли Бога о нас.
Афанасию приношаю похвалу, яко добродетель восхваляя - к Богу приношаю паче похваление, от Него же земным дается достохвально дарование добродетели, ей же бысть одушевлен образ и печать.
ЗАПЕВ. Богомудрия был еси исполнен - и паче солнца Ангельским, блаженне, житием облистав ум. Преподобне, прешел еси похвалы закона, еже от нас. Но приими, отче, аще и не подостоянию похваление.
ЗАПЕВ. Достодолжно убо песнь плетем во славную твою память - не лишаемся большаго, Афанасие, по достоянию похваления твоего: просим прощение подати и благодать тобою неоскудную духовную.
СЛАВА. Юношъски плотьским страстем играние умертвил еси - въ юности стяжав мудрость старческую - и благоуставно, Афанасие-блаженне, желанием бо премудрости вся чувъства исправил еси.
И НЫНЕ. Преславная о Тебе возъглаголашася в род и род, яже Бога Слова во утробе въмещъши. Чистая же всегда пребывши, Богородице Марие, темже - Тя вси почитаем - наше сущее по Бозе Заступление.
песнь 3, ирмос: Утвердивыи Небеса в начатце разумом и землю на водах Основавыи, на камени мя, Христе, церковнем утверди, яко несть Свята паче Тебе, едине Человеколюбче.
ЗАПЕВ. Очистив от всякия скверны душю же и тело, Афанасие, - храм яви себя достоин Богу, темже - Троицы Исполнение почи в тебе, Священнотаинниче пребогате.
ЗАПЕВ. Твою душю, якоже желаше Утешителева благодать, от страстей очищену обретши - яве в ней действеная показует и пресветло светило, отче, мирови полагает.
СЛАВА. Святительства убо правило святителем показал себя и детельна образа - житие. Слово же твое ясно - видения образ, О, премудре. Богословия же твоего - предел учения явися.
И НЫНЕ. Херувима и серафима яви себя вышъши, Богородице: Ты бо едина прият Невъместимаго Бога во утробе, Чистая, темже - вернии Тя вси песньми, Чистая, ублажаем.
ин кондак, глас 2. Богогласная труба, цевница Духовная, огненыи ум - Великии Афанасие, по достоянию подобными ему да воспоется песньми: праве бо всех научи Троицу чтити Единосущную. Седален, глас 3. Якоже предъповеле Предъвозвавыи тя - безсмертия ты ходатай был еси, яко благочестно умертвив Ариева мудрования: невредимь бо был еси Истине поборник, отче Афанасие, православных похвало, темже, - тя подолгу поюще, твою совершаем Божественную память. Слава, и ныне, Богородичный: Недомыслено и непостижимо есмь, Владычице, О, Пренепорочная, содеянное в Тебе страшное Божие таинъство: Непостижимаго бо, заченъши, родила еси плотию обложена от пречистых кровей Твоих, Его же всегда, Чистая, яко Сына Своего моли спасти душя нашя. Кресто-Богородичный: Неискусобрачная Чистая Мати Твоя, Христе, зрящи Тя мертва, висяща на древе, матерински рыдающе, глаголаше: Что Ти возъдаст еврейскии собор безъблагодатныи, иже многих и великих Твоих, Сыну Мой, даров наслаждеися ?
- Пою Твое Божественное сошествие!
песнь 4, ирмос. Ты ми, Христе, - Господь, Ты же - и Сила ми, Ты ми - Бог, Ты ми - Радование: не оставив недра Отча, но милостию Си нашу нищету посетив, тем, с пророком Аввакумом зову, силе Твоей слава, Человеколюбче.
ЗАПЕВ. Все в тебе въдохну живоносное дыхание, Иже съвыше первие пришедшее Боголепно Духа Христова в горнице и ученики насыщъшее - апостола тя показавшее, треблаженне, третияго-на-десяте, отче, православную веру проповедающа.
ЗАПЕВ. Единосущно Слово Отцу в Соборе, в Никейском, проповедавшу сопрестольнику, прежде тебе бывшаго, ему же съпоспешествова Божественною ревностию зело распаляемь, темже - Своей церкви Христос пастыреначальника и учителя тя поставляет.
ЗАПЕВ. Церковныя области смотрение приял еси от Божественнаго промышления, Афанасие, - и еретическая, душевредная вся шатания языческая, посече, якоже сечивом* из корене терния; а семя Словеси, напаяя, премудренно возъделал еси.
СЛАВА. От твоего языка огненнаго сожъжеся Ариево иноплеменное разлучение, смешение же Савелиево, безъмерная зла, и к нечестию равно причитаемо, и вся хуления с ним еретическая, О, Афанасие.
И НЫНЕ. Ты верным - Похвала еси, Безъневестная, Ты - Заступление, Ты - и Прибежище Христианом, Стена и Пристанище: к Сыну бо Твоему мольбы приношаеши, Пренепорочная, и спасаеши от бед верою и любовию Богородицу Чистую Тя знающих.
[главная][наше упование][раскол патр. Никона][раздор митр. Корнилия][ересь монаха Алимпия][богослужение][жизнь общины][отдел соц. поддержки][библиотека][фотогалерея][контакты]