[главная][наше упование][раскол патр. Никона][раздор митр. Корнилия][ересь монаха Алимпия][богослужение][жизнь общины][отдел соц. поддержки][библиотека][фотогалерея][контакты]
Список с челобитной Соловецкаго монастыря.
Какова послана к великому государю к Москве в 176 [1667], году. в октябре месяце.

Благоверному и благочестивому, и в православии пресветло сияющему, от Небеснаго Царя во царех помазанному всея вселенныя великому государю нашему царю и великому князю Алексею Михайловичю, всея Великия и Малыя и Белыя России самодержцу, бьют челом нищии твои государевы богомольцы - Соловецкаго монастыря келарь старец Азарей, да казначей старец Геронтей, и священницы, и диаконы, и соборные чернцы, и вся рядовая братия, и служки и трудники все.

По преданию, государь, Никона, бывшаго патриарха, и по новоизложенным ево книгам, проповедывают нам ныне ево никоновы ученицы новую незнаемую веру по своему плотскому мудрованию, а не по апостольскому и святых отец Преданию, ея же веры не точию мы, но и прадеды, и отцы наши до настатия Никонова патриаршества и до сего дне и времене и слухом не слыхали. А в коем православии прародители твои государевы скончалися, и многия святыя отцы и чюдотворцы наши Зосима и Саватий, и Герман, и Филипп митрополит угодили Господу Богу, и ту истинную нашу православную веру они похулили, и весь церковный чин и уставы порушили, и книги все препечатали на свой разум богопротивно и развращенно.
А и то, государь, их непотребство и развращение в тех новых книгах объявилося, и те их книги сами мимо нас обличают их в лице, якоже в книге, глаголемой Скрижали, лист 766, Дамаскин иподьякон в Слове своем в неделю третию святаго поста, повелевают нам, православным християном, ходити по татарски и без креста, и пишет сице: «кая добродетель есть носити крест на раме своем?» А святии апостоли, государь, и святии отцы крест нам на себе носити повелевают и сами носили. Яко же рече апостол: «мне же да не будет хвалитися, но токмо о кресте Господне»; и пророком Исаием Господь Бог верным своим обетова: «и приидут, и узрят славу Мою, и оставлю на них знамение»; такоже и Великии Афанасии в толковании 59-го псалма пишет: «верным, рече, людем, иже нарицаются християне, дано есть носити [и] имети крест Христов»; и Василий Великий глаголет, яко венец Царя нашего Христа крест на себе носим; и святый Ефрем Сирин в Слове еже о страшном суде пишет, яко святыи крест на себе носили; и паки в Слове о покаянии пишет - сие оружие на себе носити во дни и в нощи, и ничто же без него не творим; святая же Макрина, сестра Василия Великаго, крест на себе носила, и свидетельствует житие ея; и святый же великомученик Орест крест на себе носил, и о сем писано в мучении его; такоже и в житии Иоанна Милостиваго пишет, яко некто бяше мирянин Захария нищелюбивый, не имяше просящему у него на пути чесо дати и, снем с себя крест сребрян даде нищему. И от сего яве, государь, яко в прежняя лета в греках не точию иноцы но и мирстии человецы крест на себе носили, а ныне они не носят и нам носити возбраняют, и хотят от таковыя благодати Божия, непобедимаго на враги оружия, лишенных сотворити. Аще ли, государь, мы сие небеснаго царя оружие повержем от себе, и ходити начнем без крестов, якоже и греки ныне ходят, его же не даждь нам Боже и помыслити, то явно, государь, преданы будем в руце диаволу, и конечную радость врагу сотворим, и дерзновение ему на себе подадим. Понеже они сами проклятии бесове о себе свидетельствоваху, якоже пишет во отеческих книгах и в книзе печатной Кормчей, лист 625, егда вопросившу их некоему святу мужу, которых, рече, вещей боитеся от всех; беси же реша ему: по истине имате три вещи, велми противляющиися нам - едину от них ясте, вторую же на шеи вашей обешаете, еже есть крест Христов, в третией же мыетеся. И того ради, государь, и вси святии единомысленно крест Христов правоверным всегда носити на себе повелевают, понеже велия тайна в сем знамении святыя и неразделимыя Троицы, Отца, и Сына, и Святаго Духа прославляется; и сим знамением благочестивии от неверных разделяемся. А той Дамаскин иподиакон по диаволю научению написа в греческой своей книзе на погибель душам нашим, и велят ходити, аки татаром без крестов, и в том ему судит Господь Бог.
Да он же Дамаскин, не убояся страха Божия, отрыгнув от злаго сокровища сердца своего, в том же Слове именовал безгрешнаго Сына Божия, Господа нашего Исуса Христа, грешным, [Скрижаль лист 766], яко бы Он, Спаситель наш, распятся за некое прегрешение, а не за наше мирское спасение, и пишет сице: «тако да имате под собою смерть вашу, яко же Он, иже имать распинатися за некое погрешение, и носит крест на раме своем, и ходит, трепеща и ожидая смерти».
К сему же, государь, иныя многия непотребныя статии напечатали, яко же в книге 4-й Иоанна Дамаскина, глаголемыя Небеса, новаго же выходу Епифаниева переводу киевлянина, во главе 27, лист 47, положено, - егоже и писанию предати страшно, - проповедуют Сына Божия еще не пришедша, но впредь пришествовати Его сказуют, и напечатали сице: «Всяк убо не исповедуя Сына Божия и Бога во плоти пришествовати, антихрист есть», а не яко же апостол Иоанн Богослов в послании своем [зач. 73], «в плоть пришедша» Его глаголет, а не «пришествовати».
Такоже, государь, и воскресения Сына Божия во многих местех, в новых своих книгах, не проповедают, в Служебниках на литургии и в Триодех, в великую суботу в тропаре  еже «Благообразныи Иосиф», и в тропаре «Мироносицам женам», и в кондаке «Иже бездну затворивыи», и в светилне воскресном третием воскресение Сына Божия отставлено же, неведомо - для чего.
Да они же, государь, напечатали в новом Потребнике в молитве на крещение человеком [лист 42] повелевают молитися духу лукавому: сего же их умышления не даждь Господи Боже нам и помыслити. А в церковном, государь, священии, в том же Потребнике, напечатали не по преданию же святых отец, повелевают свящать мылом [лист 873], и то, государь, церкви не освящение, но паче осквернение, понеже в мыле бывает всякая нечистота и скверность. А над умершими, вместо помазания святаго масла, велят посыпати пепелом, его же срамно есть не точию творити, но и помыслити.
И Господу нашему Исусу Христу спасенное Его имя, нареченное от Бога святым ангелом, пременили. И самый истинный и животворящий крест Христов от трех древ, от певга и кедра и кипариса сотворенный, отставили и возненавидили его, и непотребна сотворили, а возлюбили крыж латинский, и во всем почитают его паче истиннаго божественнаго креста Христова, от трех древ сотвореннаго. А святии пророцы о том тричастном кресте Христове за много лет до Христова вочеловечения пророчествоваша, яко от трех древ сотворену ему быти глаголаша, яко же велегласный пророк Исаия о нем пишет сице [глава 60]: «слава Ливанова к Тебе приидет с певгом, и кедром, и кипарисом, прославити имя святое Мое» и прочее; такожде святый Иоанн Дамаскин о нем хваляся вопиет: «о, треблаженное древо, на нем же распятся Христос, Царь и Господь»; и в Охтае, государь, третьего гласа в среду и пяток седален на утрени: «и на кипарисе, и певге, и кедре вознеслся еси Агньче Божии»; такожде и в Многосложном своем послании Герман патриарх пишет сице [лист 2], «яко честныи и животворящии крест от трех древ - кипариса, и певга, и кедра, в тридневную смерть Господа Исуса соделан бысть; по сих же и преподобный Григорий Синаит, в воскресном дневном каноне творения своего во многих местех воспоминает точию о истинном трисоставном кресте Господни, и пишет сице: «Кресте трисоставне и трисветне, кресте треблаженныи, треобоюдныи мечю, древо трелюбезное, и знамение непостижимыя Троицы крест трисоставныи, Троицы бо носит трисоставныи образ». Такожде, государь, и вси святии пишут, и почитают той истинный трисоставный крест Христов, а не крыж двочастныи, о нем же никтоже от святых воспомянул ни во едином слове, еже бы предпочтену ему быти паче истиннаго креста Господня. Прародители же твои, государь, благоверныя царие и велиции князи, в росийской земли крыжем чести отнюдь не воздавали, и тем латинския веры не почитали Яко же во истории пишет, еже бысть от создания мира в лето 6981, егда прииде из Царя града царевна Софиа в царствующии град Москву, к великому князю Ивану Васильевичю, и с нею же прииде из Рима от папы посол Антоний лягасто, и нес пред собою крыж, великий же князь и преосвященныи Филипп, митрополит Московский, и всея Росии, и весь освященный собор, и царский синклит, и вси московстии народи с тем крыжем ни близ царствующаго града Москвы приити не попустиша, сего ради, яко да не будет нами православными латинская вера почитаема, понеже бо писание глаголет, яко возлюбив и похвалив есть чужую веру, той своей поругался есть. Такожде, государь, и вселенский учитель святый Иоанн Златоуст, той латинский крыж за истинный Крест Христов не почитает, но образ и сень быти его наричет [евангелие толковое в неделю 3 святаго поста]. И аще ли, государь, той крыж все божественное писание свидетельствует, яко образ и сень креста, а не самый истинный и животворящий крест Господень, то кая потреба ныне нам, оставя истинну, и паки тую законную сень гонити, и люторская мудрования еже крыж почитати, а истинный крест Христов призирати? И аще бы, по апостолу, первый закон непорочен был, не бы второму искалося место.
А в тех же, государь, новых книгах напечатано по того же Дамаскинову преданию, велено нам, християном, креститися щепотью треми персты. А яже мы изначала прияхом по апостольскому и святых отец преданию, и по свидетельству преподобнаго Петра Дамаскина, и святаго Феодорита, и блаженнаго Максима Грека, и по соборному уложению Макария митрополита Московскаго и всея Росии, и всего освященнаго собора, тыя новыя веры учители двема персты креститися возбраняют, а не крестящихся трема персты проклинают, тем и они точию всуе себе труждают, грех на свою главу собирают, якоже писание глаголет: аще святитель проклинает не по воли Божии, сиречь не по священным правилом, не последует им Божий суд, а непокаряющиися аще и проклинаеми от них, но от Бога великими хвалами достойни суть. А иже при благоверном царе и великом князе Иоанне Васильевиче всея Росии, преосвященный Макарий митрополит, по апостольскому преданию, на освященном богодухновенном своем соборе уложили - не крестящихся двема персты вечному проклятию предали. И они тому царскому уложению и священному собору, паче же святых отец уложению, Христову и апостольскому преданию, не повинуются, но и нам такожде повиноватися не велят, и полагают то соборное проклятие ни за что, и тем своим неповиновением учинили себя под вечным проклятием. Но и нас грешных ведут ныне с собою под тое же проклятие. А неповинующихся, государь, их странному учению, и не приемлющих новыя их веры, они, никоновы ученицы, мучат всякими томленьми, и ругаются руганием безчеловечьным. А святии, государь, апостоли, и святии отцы, в прежния лета такова ругательства, и безчеловечия и над богоотступниками отнюд не творили, но аще кто по апостолу впадет в некое прегрешение [галат., зач. 213],  и они таковыя направляли духом кротости и любовию и терпением, последствующе кроткому Пастырю и Учителю своему Христу. Понеже Он Спаситель Христос Бог наш, началник и совершитель нашея веры, сам учит пречистыми усты своими божественым своим и спасенным заповедем, не гордостию, не мучением и не руганием, якоже они творят, но сам вся претерпев нашего ради спасения. Нынешнии же, государь, на конец последняго века новыя веры проповедницы зело немилосерды, горды, неблагоприступны и нетерпеливы: аще и едино слово явится им неугодно, и они за то хощут и душю с телом разлучить и смерти предать. И воистину блажен той егоже сподобит Господь от таковых нынешних учителей до смерти пострадати, и веруем божественному писанию, яко тии паче прежних великих мучеников у Бога обрящутся. О сем бо и мы молим человеколюбие Божие, яко да и нас грешных сподобит от них пострадати, и поне малу отраду в будущем веце за своя согрешения получити.
Еще же, государь, в тех новых книгах напечатано, велено говорить аллилуия 3-жды, а четвертое - слава Тебе Боже. И мы, богомольцы твои, троити та божественная аллилуия отнюдь не смеем, бояся того же гнева Божия и Пречистыя Богородицы, иже бысть явное наказание, за утроение тоя божественныя аллилуи на Иове распопе Псковском и троеженце [маия 15, в житии преп. Евфросина Псковск.], иже и мотылный столп наречеся, егда он не послушал наказания преподобнаго отца Евфросина Псковскаго чюдотворца, еже повелеваше двоити божественная аллилуия, якоже прежде предаде ему Иосиф, Царя града вселенский патриарх; и того ради своего непослушания и суемудреннаго начинания оныи Иов восприят от Бога велие отмщение, инем впредь на уверение, прежде будущаго мучения побит богопущенною лютою язвою, и неисцельным недугом, кипел в червях и в смраде неудобьстерпимом два лета, и в той лютой язве душу свою изверже. А иже троити божественная аллилуия возбраняющаго преподобнаго отца Евфросина Псковскаго чюдотворца, за сие богоугодное мудрование Господь Бог прославил во святых. А по преставлении его нам наипаче того совершеннейше бысть извещение: сама бо Владычица наша Пресвятая Богородица, в явлении своем со архангелом Гавриилом и преподобным Евфросином явися списателю жития его, и повеле православным христианом божественная аллилуия глаголати дважды, а третие приглашати слава Тебе Боже; троящим же та божественная аллилуия изрече прещение страшно. К сему же, государь, в книге глаголемой Стоглав, в царском и святительском соборном уложении написано, яко то латинская ересь еже троити аллилуия, и пишет сице: «яко соборная апостольская церковь имеяй и предаде, еже дважды глаголати святая аллилуия, а не трегубити, понеже сия несть православных предания, но латинская ересь, не славят бо Троицу, но четверят, и Духа Святаго от Отца и Сына исходяща глаголют, и тем раболепна Духа Святаго творят. И того ради не подобает святая аллилуия трегубити, но дважды глаголати аллилуия, а третие - слава Тебе Боже. Понеже бо еврейски - аллилуия, а по нашему - слава Тебе Боже». Такожде, государь, и божественный Максим Грек в книзе своей пишет, и нарицает то латинскою ересию.
Да они же, государь, новыя веры учители, в молитве Исусове Сына Божия именовати нам не велят неведомо чесо ради. Святыи же Иоанн Златоуст в воскресном толковом евангелии пишет сице [в неделю 17]: «Аще ясте или пиете или делаете что, или шествуете, или стоите, или седите, или ино что творите, непрестанно вопийти кождо вас - Господи Исусе Христе Сыне Божии помилуй мя», и в книзе Беседах апостольских лист 130, и в Многосложных посланиях Германа патриарха Царя града, и Григория Двоесловца в книзе, и Григория Синаита, и Кирила Иеросалимскаго лист 178, и в Прологе генваря в 9 день, и июля в 22 день, и в книзе Филофея патриарха, и Нила Сорскаго, и в житии Михаила Малеина, и во Псалтырех и Часовниках печатных, и в писменных, и во многих книгах святии отцы в молитве Исусове Сына Божия глаголати повелевают.
Такожде, государь, и Символ православныя веры изменили, глаголют - «и в Духа Святаго Господа животворящаго», а «истиннаго» отставили. А святии отцы, государь, отнюдь того не изменяли, нигдеже, и прибавить или убавить собою ничесоже не смели. Якоже преподобный Иоанн Дамаскин во многосложном своем послании пишет, в соборниках дестевых, и в пол десть, и в книзе блаженнаго Максима Грека во главе 5, в Слове ответном к Николаю латынянину: «и в Духа Пресвятаго Господа истиннаго и животворящаго»; такожде и в книзе никонских правил от слова 39-го; в книзе Кирила Иеросалимскаго, лист 129 [128], и 39, 44; и паки в книзе Максима Грека во главе 1; и в книзе Кормчей московской печати, по последним числам, лист 2, в тех во всех книгах, идеже Символ православныя веры положен везде с «истинным», а «истиннаго» нигде не отставлено.
Да они же, государь, в стихе «Царю небесный Душе истинный» совершенно Духа Святаго истинным не именуют, напечатали «Царю небесный Утешителю Душе истинны», две буквы «наш» да «иже» из «истиннаго» отъяли, сотворили Духа Святаго аки причастника истине, а не самый истинный Святый Дух именуют. На троицкой вечерни молитву Святому Духу отставили всю, и ектению болшую отставили же, и молятся стоя на коленках, и глав не прекланяют; а во уставех же печатных и писменных, и в Потребниках, и в стихерах, и в той же троицкой вечерни, и стихерах, велено главы с коленома на землю преклонше молитися, а не на коленках стояти.
Трисвятое ангельское пение те новыя учители пременили, и напечатали в Ирмологе, лист 384, с прибавком сице: «сила святыи Боже, святыи Крепкии, святыи Безсмертныи, помилуй нас». А в прежние же, государь, лета, при благовернем царе Феодосии, еретицы и той ангельской песни лишние прибавляти начинали, и того ради от Господа с небесе бысть отрочатем извещение и знамение страшно, о сем свидетельствует Пролог [сентяб. 25 (20) день]. В богородичне воскресном, 8 гласа, «Иже нас ради», напечатали, «спасе наш люди отчаянныя». А отчаянныя, государь, беси именуются, а нам грешным до последняго издыхания Христос Бог наш отчаятися не повелевает: понеже отчаявыйся по божественному писанию сам ся закля.
Да они же, государь, в новых своих правилах налагают человеком бремена тяжкая и неудобь носима не против человеческия меры, и святых отец предания, и напечатали в новом Потребнике своем, в Номоканоне, во главе 109 сице: «Инок аще изыдет из монастыря, и за то его 12 лет не причащать, и в церковь не пущать». И они указали ложно на 4-е правило, святаго 4-го собора, чего отнюд в том 4-м соборе по их мудрованию не обретается. Да они же напечатали в Номоканоне [во главе 96], «инок аще в келии поет», и за то епетимии положили против блудника на 7 лет; и то, государь, все затевают они не по преданию святых отец, но собою, на погибель душам, а не на спасение. А иноческий, государь, паче ангельский, чин те новыя учители до конца исказили, и правила святаго Василия Великаго гордостию своею положили ни во что. А ходят в церковь Божию и по торгам без мантий, без’образно и безчинно, аки иноземцы, или кабацкия пропойцы. А в правилех Василия Великаго, в Номоканоне, во главе 59, иноку отнюдь без мантии быти не повелевается, не точию на молитве, но и на рукоделии. А в пострижении, государь, иноческом в Потребнице печатном, той мантии и параманда на пострижеников класть у них не указано, и стихов не положено же.
Да они же, государь, в покаянии, и исповедании, псалмы и молитвы и исповеди исповедником, и над умершими прощалныя и разрешалныя молитвы, и на великия Господьския праздники величания и святых отставили, и все действо в божественных службах, творение Василия Великаго, Иоанна Златоустаго, и Григория папы Римскаго, преложили на свой разум богопротивно и развратно. Такоже и прочее церковное пение - утреню, вечерню, павечерницу, и полунощницы, и молебны, и панихиды, и вкратце рещи весь чин и устав, что содержит церковь Божия, то все пременили.
А книги препечатали не по преданию святых отец, и всю православную христианскую веру испревратили на свой разум богопротивно, а свидетельство приводят на греческия книги, и глаголют яко бы в греческих книгах написано, и печатают с них без свидетельства. Аще что и доконца непотребно, и тому они не внимают, но точию было бы им против греческих книг. И теми, государь, греческими книгами они православную веру до толика истребили, якоже и несть православия в твоем государьстве Российском царствии. Которая вера до сего времени отнюд не именовалася, ныне же тоя новыя веры учители учат нас новой и неслышанной веры, якоже не знающих Бога мордву или черемису. Мы, богомольцы твои, государь, аще и многогрешни есмы, но обаче держим истинную и самем Господем нашим Исус Христом преданную веру, и святыми отцы седмию вселенскими соборы утверженную непоколебиму и нерушимо. То же предание, которое до сего времени держаша прародители твои государевы, благовернии царие и велиции князи, и отец твой государь наш царь и великий князь Михаил Феодоровичь всея России, в ней же и чюдотворцы и началницы наши Зосима и Саватий, Герман и Филипп митрополит Московский и всея России, и вси святии отцы Господу Богу угодиша, и многия чюдотворныя иконы Господь Бог в чюдесех у нас в Руской земли прославил, и ныне прославляет, и неизреченную свою милость нам подает.
Сверх, государь, [того] вселенскии патриархи преже бывшии у нас в руской земли, Иеремия Цареградский, и Феофан Иеросалимский, и иныя многия палестинския власти, о нашей православней истинней вере свидетельствуют сице [книга Кормчая лист 15, 25 печати московския]: «Понеже в Царе граде и во Иеросалиме конечное разорение православныя веры греческаго закона, от агарянскаго насилия и погубления, и церквам Божиим запустение и разорение, но точию ты един на всей вселенней владыка и блюститель непорочныя веры христианския, самодержавный великий государь царь благочестием всех превзыде, и вся благочестивыя в твое государево едино царство собрашася, и третий Рим благочестия ради твое государево Московское царство именоваша».
Д и то, государь, в божественном писании всем нам не малое на нашу православную веру свидетельство, якоже в книге печатной, глаголемой Кормчей, пишется [книга Кормчая, лист 572]: «Егда святыя церкви без мятежа и без пакости в мире бывают, тогда вся благая от Бога бывают подаваема». Такоже пременения ради церковнаго пения и святых отец предания вся злая на них приходят. Ныне же, государь, грех ради наших попущением Божиим, отнележе они новыя учители, начаша изменяти церковное пение и святых отец предание, и православную веру, и от того, государь, времени в твоем российском государьствии начаша быти вся неполезная, моры и войны безвременны, и пожары частыя, и скудость хлебная, и всякое благих оскудение. И аще, государь, толикия многия и безчисленныя свидетельства на нашу православную християнскую веру, яко непоколеблемо в православных догматех и в церковных исправлениих, и до сего времени пребывает, и за церковное пение пременение видим вси наказание Божие, то кая, государь, нужда нам ту истинную православную веру, самем Господем Богом преданную, и утверженную святыми отцы, и вселенскими верховнейшими патриархи похваленную, ныне оставити, и держати новое предание и новую веру? Аще ли, государь, нам на конец последняго века учитися паки новой вере, и слушати их непотребнаго учения, егоже страшно и помыслити, не точию творити, еже духу нечистому молитися, и ходити по-татарски без креста, и безгрешнаго Сына Божия именовати грешным, и воскресения Его и вочеловечения не проповедати, и креститися трема персты, и истинныи крест отринути, и крыж латинский почитати, и «аллилуия» четверить, и прочая их неугодная мудрствовати, то разве, государь, и креститися нам будет паки второе, святых же угодников Божиих чюдотворцов из церкве Божии по их мудрованию будет изринути вон, егоже не даждь нам Боже и слышати? И аще, по их новых учителей хулению, держали мы по се время бутто не истинную православную веру, но убо прародители твои государевы, благовернии царие и велиции князи, и святии отцы, известно православнии. Аще ли, государь, они православнии, то и мы в том же благочестии пребываем. Аще ли, государь, они православнии и мы тех же наследницы, то почто им у нас православную христианскую веру отъимати и учити нас новой вере, аки истинному учению, тем, которая сами ничего не знают, и конечнаго учения и исправления в православней вере требуют?
Понеже, государь, очи ушию вернейши суть, и паче слуха видение, всем нам явно каково их исправление, наипаче же самому тебе, государю, ведомо. Ибо и самыя греческия учители егда призжают в рускую землю, и не един лица своего прекрестити не умеют, и ходят без крестов. А у нас, государь, невежи и поселяне им дивятся, и глаголют что де они, палестинския власти, пастыри и учители нарицаются, и в иную землю учити приезжают, а сами лица своего прекрестити не умеют; то како и чему им нас, поселян, научити, и какова от них научитися нам православия, каковаго ждать в вере исправления? А божественное же, государь, писание не истово крестящияся нарицает отметниками креста Христова, и пишет сице: «Аще кто леностно или нерадением, или невежеством не исправляет креста на лицы своем, той отмещется креста Христова и предается диаволу». Поистинне, государь, те прежния вселенския патриархи, Иеремия и Феофан, писали о греках не мимо дела, что православная вера у них от насилия поган турок до конца изсякла.
А нынешнии, государь, греческии учители приезжают из своей земли в твое государьство, благочестивое царство, не ис­правлять, но злата и серебра, и вещей собирати, и мир истощати. В лепоту убо, государь, приезжати им в твое государьство, в благочестивое царствие, самим учитися православней християнстей вере и благочестия навыкнути, яко да довольни будут во своей земли и иных научити. Подобает бо, государь, по Божественному писанию, учителю самому прежде научитися и творити, такожде и иных учити подобает. Ныне же, государь, видя в нас от их греческаго новаго учения толикое в православней нашей христианстей вере смятение и церквам Божиим неумирение, и по­вседневное преложение, и многия иноземцы посмехаются нам, и глаголют, бутто мы, православные християне, веры по се время не знали,и аще будет и знали, то ныне заблудили, потому что де ваша вера и книги переменены по новому и с прежними вашими кни­гами, кои при прежних царех и патриарсех были, нынешний книги ни в чем не сходятся. И нам, государь, противо их ругательства ответу дать нечего, потому что они наше непостоянство поносят, укоряют делом, слыша у нас ныне в церквах Божиих повседневныя премени и православной нашей вере в книгах велие смятение. Но тем правимся и от них отходим, и говорим, что у нас истинная християнская ве­ра православная от крещения Руской земли прародителя тво­его государя, благовернаго и равно-апостольнаго великаго князя Владимира, лет с семь сот до Никонова патриаршества и учеников его, и до нынешних греческих учителей, и стояла во благочестии нерушима и непоколебимо, и твоему, великого государя, Росийскому царствию от иноплеменных разорения и церквам Божиим запустения и еретическаго раздрания, и книгам святых истребление, при прародителях твоих государевых, и твоими, великого государя, праведными молитвами, не бывало измены у нас православней вере христианстей, и быти не отчего. А сверх того, государь, тое нашу православную веру свидетельствовали вселенские патри­архи и вси палестинские власти не во едино время, но и до кон­ца у нас в российской земли благочестивое и истинное православие похвалили и писанию предали, и печатьми царскими и рука­ми своими то писание утвердивше в соборней апостольстей церкви положили, яко же в преждереченной книге Кормчей о сем свидетельствует, и хотяй сего подлинно уведати сам да смотрит тамо. Понеже, государь, зависть не весть предпочитати полезнаго, и никакоже оставляет познати истинны, тем греческия учители, и никоновы ученицы, завистию подвизаеми, тех вселенских прежних патриархов на богодухновенную нашу истинную православную християнскую веру и сви­детельство положили ни во что.
И им, государь, греком, православную християнскую веру по се время изронити не дивно, понеже живут, яко овцы посреде волков, толико множество лет посреде безбожных пога­ных турков во всяком озлоблении, и православную веру дер­жат дни своя окупаючи, и многие монастыри, и церкви Божия стали у них в конечном разорении. А книги, государь, у них, греков, кои прежнего благочестиваго исправления были, после царе-градскаго взятия, отняли римляне, и препечатали у себя по своему латинскому обычаю: и те им свои латинские книги дали, а прежние все огнем сожгли, и о сем свидетельст­вует, в книзе своей, блаженный Максим Грек.
А у нас, государь, в Руской земли, в твоем государстве, Российском царствии, благодатию Христовою по се время того не бывало. А кои, государь, кни­ги греков выходят вновь, и те многие книги печатают они у них, у латин в Риме и в Венеции, или хто хочет где. А которыя, государь, старые книги у них, у греков, ныне еще есть, и те книги от еретик многия испорчены, насеянны многохудных плевел, понеже во время тех старых книг в греках еретиков и бого­хульников, и иконоборцов было много, и святых седмь соборов было на еретиков же. Да и нам, государь, ныне те их книги стали явны, что они не исправны, от еретиков испор­чены. Понеже, государь, в руских наших печатных книгах до сего времени, доколе из греческих книг не печатали, и ни ко­торые повинки не бывало и зазору. А как начали печатать с греческих преводов, и в тех руских, в новых печатных кни­гах, объявилося много худых и богохульных и непотребных речей, их же вкратце в мале тебе, великому государю, в сей челобитной выше сего изъявихом.
Милосердый и благочестивый Богом избранный великий государь царь, и великий государь царь, и великий князь Алексей Михайловичь, всея великия и малыя и белыя России самодержец, молим твою великаго государя благочестивую державу, и плачемся со слезами вси, и милости просим. Помилуй нас нищих богомолцов своих, и сотвори до нас сирот великую любовь, не вели, государь, у нас тем новым учителем, и вселенским патриархом истинную нашу христианскую веру, самем Господем нашим Исус Христом, и святыми Его апостолы преданную, седмию вселенскими святыми соборы, и твоими государевыми прародители утверженную изменити и поругати, чтобы нам Господа Бога и Спаса нашего Исуса Христа, Царя царствующим, и Господа господьствующим не прогневать, и вовеки бесконечныя в мучение осужденым не быть. И тою новою верою прародителей твоих государевых и святых отец не похулить. А иноземцов и хулников нашея православныя веры впредь дерзновения не подать. И повели, государь, нам быти в том же благочестии и предании, в коем чюдотворцы наши Зосима и Саватий и Герман и Филипп митрополит Московский и всея России, и вси святии угодили Богу, и вси прародители твои и родители, отец твой блаженныя памяти, благочестивый великий государь царь и великий князь Михаил Феодоровичь всея России, и дед твой блаженныя памяти Филарет Никитичь патриарх Московский и всея России богоугодно препроводиша дни своя. Чтобы нам, государь, под запрещением и клятвою святых отец не быть во веки душею и телом не погибнуть.

Ащели твой, великаго государя, помазанника Божия и царя, гнев на нас грешных излиется, и православную нашу христианскую истинную непорочную веру, тем новым проповедником, новыя и незнаемыя веры провозвестником отняти от нас попустити изволишь, и чюдотворцев, наших и прочих святых отец предание изменить, и о сем тебе, великому государю, прежде в челобитной своей писали, и ныне тожде пишем. Лучше нам временною смертию умрети, нежели вечно погибнути, или аще, государь, огню и мукам нас те новыя учители предадут, или и на уды разсекут, и мы убо апостольскаго и отеческаго предания не отступим вовеки. Великий государь царь смилуйся пожалуй...

Благочестивому читателю о Господе радоватися и умудрятися!